አትሂድ

 አትሂድ አትሂድ ብዬ ጮሄ ነበር ብሬን አንስቼ

የሀገርን ጥቅም የወገንን ፍቅር ባክብሮት አይቼ

አትሂድ ብዬ ነበር ወገቤን ታጥቄ

ሀገር ያለ እኛ ላብ እንዳትኖር አውቄ

ተው ብዬህ ነበረ 

ከልክየህ ነበረ

ከባህር የወጣ ተረቴን ተርቼ

ከመሄድ ሀሳብህ ላቅብህ ተግቼ

መንገዱ እሾህ በዝቶት ምን ጫማ ባይኖረን

ትቼ ልሂድ አትበል እንጥረገው አብረን

እያልኩኝ ወትውቼ

አሳስቼህ ነበር እኔም ተሳስቼ

እርግጥ

እርግጥ አትሂድ ብዬ ያኔ የፃፍኩበት

እርግጥ አትሂድ ብዬ ያኔ የፃፍኩበት

ብዕር የለም እንጅ ውብ ቀለም አልቆበት

ይታዘበኝ ነበር ይሄን መልሼበት 

ልክ ነበርክ አንተ

ኽም

እዚህ ለፍተህ ስትኖር ባገርህ አፈር ላይ

'አባን ከና' የሚል ያንተን ልፋት የሚያይ

አንዳችም ሰው የለም ህዝቡ ውጭ አምልኳል

ልቡ ተንበርክኳል

ላገር ስታነባ በጥቅም ይለካል

በነጻ ያላበህ በዶራል ይተካል

አሁን በቀደም ለት

ለቤታችን ምርጊት ያቦካናት ጭቃ

ብሎኬት ለማቆም ቦታው ተፈልጎ ተጣለች ተዝቃ

ተመስገን ማለት ነው ቀርቶ መማረሩ

ስንዝር መቀበሪያም ካልጠፋ ባገሩ

ተመስገን ነው ጥሩ

ለኑሮማ ሚሆን መሬት ማን አሲዞን

ቤታችን ወደ ላይ ቢቀርበን እግዜሩ

ወደላይ ነው ጥሩ

ወደ ላይ ወደ ላይ ወደላይ አሻቅቦ

አንደኛው ባንዱላይ ኑሮውን ደርቦ

......ህ........ም..........

እግዚያር ቀረበ ጸሎትህ ተሰማ

ባለ - ቤት ልትሆን ነው እዚሁ ከተማ

እሰይ፥ እሰይ እሰይ የምስራች ለነዋሪው ሁሉ

ሀገር ለወደደ ከነምናምኑ

ለደሃው የሆነ ደርሶ ለተገፋ

ፎቅ ቤት በያይነቱ መጣ በወረፋ

ሲባል ጆሮህ ሰምቶ

ከጸሎትህ ጋራ እጣ ፈንታህ ገብቶ

የጣ ቁጥር ይዘህ አመታት ቆይቶ

ቆይቶ ቆይቶ ቆይቶ ቆይቶ....ቆ...ይ...ቶ!

ቅድሚያ ይሰጥሃል ስትከፍል መቶ

እንኳን መቶ ቀርቶ የለህም ሰላሳ

በቃ እድልህን ጠብቅ

የሚያለማ መጥቶ ሰፈሩ እስኪነሳ

......እናልህ ወዳጄ........

ከዚህ ሁሉ ፍዳ ከዚህ ሁሉ ጣጣ

ምን አለበት አሁን ደርሰህ ብትመጣ

ምን ያደርግልሃል? ምን ያደርግልሃል? መሆን ያገር ዜጋ

ሞልቷል ትርፍ መሬት ክፍቱን የሚያዛጋ

ነጻ ሚሰጥህ ግን በሰው ሃገር ለፍተህ ላገኘኸው ጸጋ

እንዲሆንህ ዋጋ

......ህ........ም..........

ጠብታ ውሃ ነው ድንጋይ የሚበሳ

እንጩህ ዝምብለን ህዝብ እስከሚነቃ ሀገር እስኪነሳ

ብዬህ ነበር ያኔ አለማወቅ ደጉ

ለካስ ወርቁን ትቶ ለመዳብ ነው ጉጉ

ሀገር መሀል ሆነህ ሀገር መሀል ሆነህ

ለሀገር ስትጮህ፥የለም የሚያዳምጥ

ማዶ ስትሆን ነው የሹክሹክታህ ጉልበት ሀገር የሚለውጥ

ብትስቅ ብታለቅስ ሰዉ በወረፋ ሊያይህ የሚጋፋ

ዘፈንህ የሚያምር እስክሳህ የሚደምቅ

ካገር ስትወጣ ነው ጥበብህ የሚረቅ 

እድሜህን ቀርጥፈህ ብቶን ባለ ድግሪ

ማስትሬት ዶክትሬት ብትደክም ብትለፋ

እውነቱን ልንገርህ በሃገሬ ሂሳብ

ከውጪ የመጣ የሶስት ወር ኮርስ ነው ሚዛኑን ሚደፋ

.....ይሄወልህ ወዳጄ.......

ያገሬ ጎበዛት ህዝብ የምንላቸው

ያለኛ ጨውነት ጥፍጥናም የላቸው

ብለን ያንልላቸው

ባንተ ካገር መኖር ጉዳይም የላቸው

ምን ታሪክ ቢሰራ ነብይ በሀገሩ መቼ ይከበራል

ተረት እያወሩ

ጸበል ጓሮ አግኝተው ቁርበት ነከሩበት

በል እኔን አትስማኝ አንተ እወቅበት

......አሁን ሌላውን ተው........

ቀበሌ ሄደሃል ገጥሞህ አንዳች ጉዳይ

በሀገር ነዋሪ መሆንህ እንዲታይ

ይታወቅልህ ዘንድ የነዋሪ መግለጫ

ስጡኝ ብትላቸው

ሰው የለውም ቢሮው ባዶ መቀመጫ

አ ሁን ለሻይ ወጡ ጠጥተው እስኪመጡ

አንድ ሁለት ሶስት ሰአት አርፈው ይቀመጡ

ነገ ደግሞ የሉም ስለሚደክማቸው

እረፍት ላይ ናቸው

የሆነ ቀን ታመው ሌላ ቀን ረስተው

ወጡ ሳይፈርሙ ስብሰባ ላይ ናቸው

ስራ እያስቀደሙ

ስራ እያስቀደሙ፥ ምንድን ነው ስራቸው?

ዛሬም ከስብሰባ ነገም ካለቃ ጋር የሚያጣጥዳቸው

ያን ጊዜ ለምርጫ ቅስቀሳ ሲዞሩ

ያንተን መታወቂያ ባግባቡ ሊሰሩ

ነበረ ዲስኩሩ፣እሳቸው ግን የሉም

ባዶ ነው ወንበሩ

.......ህ........ም.........

ተዋቸው ተዋቸው ልንገርህ

ብሄድ ነው የሚያዋጣ

አለህ የሚልህ ከሌለ ምናል ካገር ብትወጣ

አንዱ ሀገር ሶስት አመት ኖረህ 

ጸጉርህን ለውጠህ ብትመጣ

ቀድሞም ችግር አይኖርህ

የማን አይን አየህ በክፉ

አንዳችም እንዳትጉላላ ሊያውም ተክነው በዘርፉ

እንደ ሄድክበት ሃገር እረፍትም የሌላቸው

ያንተን ችግር አዳማጭ ክቡር ሚንስትር ናቸው

ምን እንሰይምልህ በየ አደባባዩ

የሚመጡት ልጆች ያንተን ግብር እንዲያዩ

የሚባል ዘመቻ ያለው ላንተ ብቻ

..........ህ.......ም...........

ሽማግሌ ልከህ የከለከሉህን ቆንጆዋን ኮረዳ

በፈለከው ሰአት ስበህ የምትወስደው ከትዬው ጓዳ

በህጻን ባዋቂው እንዲያ ምትወደድ

ብትርቅ አይደልም ወይ ካገር ብት ሰ ደድ!

.......ህ.........ም...........

ታዘብኩት እኔኑ

ታዘብኩት እኔኑ አፈርኩኝ በራሴ

ያን የመሰለ ሃሳብ እንዲያ ማራከሴ

እንኳን በምድራዊው ባለማዊው መድረክ

ለነብስህ ልታድር ልትታረቅ ካምላክ

የላብህን ቋጥረህ ለግዚያር ስጦታ

አስራት ልታወጣ መቀነት ብትፈታ

ካንተ አንድ መቶብር

ያምስት ዶላር ጥሪ ይደምቃል እልልታ

.......ህ.........ም...........

ምን ያደርግልሃል? ምንያደርግልሃል?

ምስጋናቢስ ቄዬ ውለታ ቢስ ሀገር

ለሄደ እየኖረ ያለን ለሚያባርር

ምን ያደርግልሃል? ምን ያደርግልሃል?

ምስጋናቢስ ቄዬ ውለታ ቢስ ሀገር

ለሄደ እየኖረ ያለን ለሚያባርር

......አይ....እኔ......

ጥበበኛ ሲጎል ከያኒ ሲታጣ

ሀገር ነው የሚጎል ቄዬ ነው ሚቀጣ

ባንዲራ ነው ሚፈዝ መዝሙር ቅጥ የሚያጣ

ብዬህ ነበር ያኔ ካገር እንዳትወጣ

አገር፣አድባር የለም ጥበበኛም ጎሏል

ዋርካ ጥላ አይሆንም ሞገስ ክብሩን ጥሏል

የምን ደግሞ ዋርካ

ደግሞ የምን ዋርካ? በደና መጥረቢያ ወገቡ ላይ ሰብሮ

መሬቱን ለልማት ግንዱን ለቤት ማግሮ

ለለውጥ መገስገስ ከተማ አሰማምሮ

ምን ያደርጋል እውቀት አስተሳሰብ ዜሮ!

በድንጋይ ላይ ድንጋይ በህንጻ ላይ ህንጻ

ፋሽኑ ዘንድሮ

ዋሽንግተን ክትፎ ስኩል ኦፍ ፕላኔት

ጀነሬሽን ቢውቲ ፍሪደም ዳቦ ቤት

የጎንደር እስክታ በክለብ አትላንታ

.....ህ......ም.....

ይሄ ነው ትውልድህ አንዳችም ማያተርፍ

ያንተን ባገር መኖር ከቁጥር የማይጥፍ

ስለዚህ.... ስለዚህ....... አጠፍኩት

አትሂድ ያልኩትን ሽሬዋለሁ ዛሬ

ይልቅ ስቴድ ጥራኝ ልሻገር አብሬ

መቼም ያሳ ዝላይ መልሶ ከውሃው ነው

እመጣለሁ ዞሬ፤ስሜን ቀያይሬ

መቼም ያሳ ዝላይ መልሶ ከውሃው ነው

እመጣለሁ ዞሬ፤ስሜን ቀያይሬ

ያኔ ይቀበለኛል ፍቅር ያጠግበኛል

ህዝቤ... ሀገሬ.... ክብሬ

መቼም ያሳ ዝላይ መልሶ ከውሃው ነው

እመጣለሁ ዞሬ፤ስሜን ቀያይሬ

ያኔ ይቀበለኛል ፍቅር ያጠግበኛል

ህዝቤ... ሀገሬ..... ክ.ብ.ሬ

ሜሮን ጌትነት

ሽፍቶችና መሪዎች

መሪዎች ወይም በድንቁርና ወይም በክፋት ወይም በራስ ወዳድነት ወይም በሌላ ምክንያት የተነሳ ወደ ነጂዎች ሲለወጡ ህዝቡ መነዳት ስለሚከፋው ከውስጡ ከአንጀቱ ሽፍቶችን ያፈልቃል ፡፡ እነዚህ ሽፍቶች በቀጥታም ሆነ በተዘዋዋሪ በግልፅም ሆነ በስውር ከህዝቡ ሙሉ ድጋፍ ያገኛሉ ፡፡ ህዝቡ አቀፋቸው ይባላል ፡፡ ስለዚህም ሰነባብተው ሰውተውና ተሰውተው ያሸንፋሉ፡፡ሽፍቶች ነጂዎችን ያስወግዳሉ፡፡ እፎይ ግልግል…… ከዚያስ 

ከዚያማ ሽፍቶች የነበሩ መሪዎች ይሆናሉ- እነሱም ሰነባብተው ለገዛ ምክንያታቸው ወደ ነጂዎች እሰኪለወጡ ድረስ ፡፡ በራሺያ ሰፊ አገር እነ ሌኒን ፣እነ ትሮተስኪ ድንቅ ሽፍቶች ነበሩ፡፡የዓልም አንድ ስድስተኛ ህዝብ በሚኖርባተ በቻይና አገር የተነሱት እነ ማኦ፣ በ ጁ እና ኤን ላይ ተወዳጅ ሽፍቶች ነበሩ፡፡ በቬትናም እነ ሆ ቺ ሚን የሚያስገርሙ ሽፍቶች ነበሩ፡፡ በኩባ እነ ፊደል ካስትሮ ፣እነ ቼ ጉዌቬራ ታይተው ተሰምተው የማይታወቁ፣ዓለምን የነሸጡ ሽፍቶች ነበሩ፡፡ እነዚህ ሁሉ ቆንጅዬ ሽፍቶች የህዝብን ብሶት ይዘው ስለተነሱ ድል አደረጉ፡፡ በሽፍትነታቸው ዘመን ተዓምር ነው ወይም ምትሃት ነው የሚያሰኝ ብዙ ጀብዱ ፈፀሙ ፡፡ የሽፍትነታቸው ዘመን ሲተረክና ሲፃፍ ገድል ይመሰስላል ፡፡ ገድል ነው ደግሞ -ምድራዊ ሆነ እንጅ ፡፡

እንደተለመደው አገርን በሴት ብንመስላት ፣ሽፍቶች የነበሩት ተለውጠው መሪዎች ሲሆኑ ውሽማ የነበረው ሰውዬ ባል ሆነ እንደ ማለት ነው፡፡ሰውየው ያው ሆኖም ፣ በውሽምነቱ ሌላ በባልነቱ ሌላ ፡፡ አረ የትና የት

ባጠቃላይ እንዴው በጭፍን ያህል ስንናገር በአንድ ልብ በአንድ ወኔ ለአንድ ዓላማ ሲዋጉ የነበሩት ሽፍቶች ፣መሪዎች በሆኑ በማግስቱ አላማቸውም ልባቸውም መለያየት ይጀምራል ፡፡ ልዩነቶቻቸው እየበዙ እየከረሩ ሲሄዱ ፣ ጠላትነት እየተንፏቀቀ መሃላቸው ይገባል፡፡በራሺያ ስታሊን ትሮትስኪን ካገር ያባርረዋል ፡፡ከዚያም ሜክሲኮ ድረስ ልኮ ያስገድለዋል ፡፡ሽፍቶች የነበሩት የትሮትስኪ ወገኖች ፣ ሽፍቶች በነበሩት በስታሊን ወገኖች ይጨፈጨፋሉ፡፡

በቻይና ሽፍታ የነበረው ሊዮ ሻዎ ቺ፣ሽፍቶች ወደ መሪዎቹ ሲለወጡ የመከላከያ ሚኒስትር ሆኖ ቆዬ፡፡ ያውም አሪፍ! ተዘርዝሮ የማያልቅ አደጋ አብረው ያሳለፉና ስንትና ስንት ድል አብረው የተቀዳጀጁ ነበሩ ማኦ እና ሊዮ፡፡ በሽፍትነት ዘመን በደጉ ዘመን ፡፡ አለፈቻ የሽፍትነት ዘመን፡፡ አይ ደግ ዘመን ስንትና ስንት አመት የመሞት የመቁሰል አደጋ እያለበትም፣ ረሀብና ውሀ ጥም እየተጠናወተውም አብረን ነበር እምንቆስለው፣ እምንሞተው፣ ባንድ ላይ ነበር እምንራበው ፣እምንጠማው ፣ስናገኝም አብረን ነበር እምንደሰተው ፣ ያውም አንተ ቅደም አንተ ቅደም እየተባባልን፡፡ አይ ውቢቱ የሽፍትነት ዘመን ሁላችንም የህዝባችን ኡኡታ ጠርቶን ወጣን ከየቤታችን ፡፡ ተዋጋነው ያን ኡኡ ያሰኘው የነበረውን (እኛም ህዝብ ነንና የህዝባችን ያካሉ ቁራጭ ነንና የህዝባችንም ኡኡታ ውስጣችንም ነበረ) እና ባንድነት ተዋጋነው -ያኔ ቢያስፈልግ አንተ ለኔ ትሞትልኝ ነበር ፣እኔም ላንተ፡፡ 

ዛሬ ግን ዞረን እኔና አንተ እርስ በርሳችን ልንጋደል ሆነ…በመሀሉ ምን መጣና እንዲሀ ለወጠን? እኔም አንተም እያወቅነው!? ተጋግዘን ጭራቁን ማባረር ሌላ፣ተጋግዘን ቻይናን መምራት ሌላ፡፡ የት ነው የተጠፋፋነው መሰለህ? ሁለታችንም ለቻይና ህዝብ ለመሞት ወይም ለማሸነፍ ወጣን፡፡ በለስ ቀናን አሸነፍን ፡፡ ቀጥሎ ምን መጣ? ያቺን ከህይወታችን አብልጠን እየወደድናት እኩል ልንሞትላት ተስማምተን የተዋጋንላት -ቻይና፡፡

አሁን ተራችን መጣ ፣እንምራት እናታችንን ስንል እኔ በዚህ በኩል ይሻላል ስል አንተ በዚያ በኩል ይሸላል ስትል መንገዳችን ተቃራኒ ሆነ ፡፡ አንተም ከልብህ ካንጀትህ ለቻይናችን ይበጃታል ያልከው -ወደዚያ አመራ፡፡ እኔም ከልቤ ካንጀቴ ለህዝባችን ይሻለዋል ያልሁት ወደዚህ አመራ፡፡ የኔ እና የአንተ አብሮ መጓዝ አበቃ ።

እየወደድኩህ እያከበርኩህም ያንተ መንገድ  ቻይናን ይጎዳታል እንጅ አይበጃትም በዬ ስላመንኩ እቃወማለሁ፡፡ አንተም እንደዚህ ነው ስለእኔና ስለቻይና የምታስበው ፡፡ ምነው ያንተ መንገድ ትክክል በመሰለኝና አብሬህ በተጓዝኩ ባይሆንልኝም ያንተንና የቻይናን መንገድ ለመጥረግ በሞከርኩ፡፡ግን ባንተ ቤት የኔ መንገድ የቻይና ጥፋት በኔ ቤት ያንተ መንገድ የቻይና ጥፋት ፡፡

ቻይና ከመጥፋቷ በፊት ማንም ግለሰብ መጥፋት አለበት- አንተም ሆንክ እኔ፡፡አያሳዝንም?  ወይ እኔ ወይ አንተ መጥፋት ሲኖርብን? እኔና አንተ ልንቻቻል አልቻልንማ! ምናልባት ላንጠፋፋ እንችል ነበር ይሆን? ከኛ በኋላ የሚመጡ አብዮታውያን ያስቡበት፡፡የት እንደተጠፋፋን መርምረው ይደረሱበት፣እዚያ ሲደርሱ እንደኛ እንዳይጠፉ፡፡  

በታሪክ የምናውቃቸው ሊዮ፣ሻዎ፣ቼ እና ማኦ እስከመጋደል ደረሱ ፡፡ ቼ እና ካስትሮ እንደተከባበሩ እንደተዋደዱ ተለያዩ፡፡በታሪክ ሳይሆን በምናባችን ቼ እንዲህ ብሎ ያስባል፡፡በዚህ በኩል ቀድመው ለህዝባቸው የታገሉና ታግለው አሸንፈው በኋላ ‹ቀኝ ኋላ ዙር› ብለው እርስ በርስ የተፋጠጡ አሉ፡፡ በዚህ በኩል ደግሞ የመላው ዓለም ጭቁኖች ብዙ ናቸው ፡፡ የኩባ ህዝብ ትንሽ ነው ፡፡ እናም ነፃ ወጥቷል፡፡ 

በሚቀጥለው ምእራፍ እኔና ፊደል እርስ በርስ መጠራጠር ፣መጠንቀቅ ፣መጠማመድ ፣መገዳደል ከመሚኖርብን ቀድሜ ውልቅ አልለውም? ነፃነት የጠማው ህዝብ መች ጠፋና ሰው እንደሆነ ያው ሰው ነው ፡፡ የትም ቢኖር ምንም ዓይነት መልክ ቢኖረው ፣ ምንም አይነት እምነት ቢኖረው፡፡ ስለዚህ ወደ ቦሊቪያ!

ምናብ ምን ይሳናታል? አሁን ደሞ ፊደል ካስትሮን እንሆናለን ፡፡ በምናብ ፀጋ ያስባል ፡፡ ፊደል ፡፡ ያየዋል ‹ቼ› የጤና ጥበቃ ሚኒስትርም ሆኖ ኩባን ሲመራ ፣የኢንዱስትርም ሆኖ ሲያገለግል፡፡

ገና ይህ ሰውዬ እዚህ ከመምጣቱ በፊት ፣እኛን ነፃ ከማውጣቱ በፊት ፣ በሦስት ሌላ አገር ውስጥ ተዋግቷል ፡፡ አስማውን በአንድ እጁ እያስታመመ ፣ጠላት ላይ በሌላ እጁ እየተኮሰ ፣ ተኩሱ ጋብ ሲል ቁስለኞችን እያከመ፡፡ ያን ሁሉ ጀብዱና ከሞት መፋጠጥ ለምዶ አሁን ኩባን ለማስተዳደር ይቸከዋል፣ይሰለቸዋል፡፡ ምን በወጣው!

በል እንግዲህ ቼ ቢሮክራሲውና ወረቀቱ በቃህ ፡፡ ከእንግዲህ እኛ እንቀጥላለን ፡፡ሂድና ደሞ ሌላ ኩባ ውስጥ ገብተህ ተዋጋ፡፡ ተዋጊ ነህ አስምን በየደቂቃው ትዋጋለህ ብቻህን ምነው አንዲቷን እንኳ በአስም መታፈን እኔ ልታመምልህ በቻልኩ፡፡ሂድ በቃ ተዋጋው ሰይጣንን፡፡ይቅናህ የኔ ጎበዝ ይለውና ይሰነባበታሉ፡፡

ይህ በኩባ ሆነ ፡፡ ወደ ቻይና ስንመለስ ግን ማኦ እና ሊዮ ሻዎ ቺ ተቃቅረው እናገኛቸዋለን ፡፡ነገሮች እየተባባሱ ይሄዳሉ፡፡ አንድ ቀን ሊዮ ሻዎ ቺ ካገር ለመጥፋት በአውሮፕላን ሲበር የሊቀመንበር ማኦ ወገኖች ነቅተውበት ኖሮ ተኩሰው አውሮፕላኑን አጋይተው ይገድሉታል ፡፡ ዘመናት ካለፉ በኋላ  ደግሞ እነ ዴንግ ሲያዎ ፒንግ የሊቀመንበር ማኦን ሚስትና ሦስት ግብረ አበሮቿን ‹‹አራቱ ወንበዴዎች››(ጋንግ ኦቭ ፎር ) በይፋና በብዙ ልፈፋ አዋርደው ያቀርቧቸዋል፡፡

መንግስት በአንድ መልኩ የህዝቡ ጠባቂ ነው ፡፡ ከውጭ ጠላት ይጠብቀዋል፣ እርስ በርሱ እንዳይባላም ይጠብቀዋል፡፡ በሌላ መልኩ ግን መንግስት ምንም ያክል ጥሩ መንግስት ቢሆን አስገዳጅ ኃይል ነው፡፡ለዚህም ፖሊሶች፣ ፍርድ ቤቶች ፣እስር ቤቶች ምስክር ናቸው ፡፡ስለዚህ አንዳንድ ሽፍቶች አሉ፣ ከሽፍትነት በኋላ መሪነቱ የማይጥማቸው ፡፡ከነዚህ እጅግ ዝነኛውና የመላ ዓለም ተራማጆች የሚያመልኩት ጀግናው ቼ ጉዌቬራ ነው ቪቫ ቼ!

ቼ የአብዮታወያን አርአያ ነው ፡፡

‹‹ሀ›› ብልን ስንጀምር የኩባን  ሽፍቶች ወደ ድል ከመሯቸው ቀንደኛ ተዋጊዎች አንዱ የሆነው ቼ ጉዌቬራ ኩባዊ አይደለም ፡፡የአርጅንቲና ሰው ነው፡፡ ‹‹ለ›› ብለን ስንቀጥል ቼ ጉዌቬራ በኩባ ከመከሰቱ በፊት በሦስት ሌሎች የላቲን አሜሪካ አገሮች ውስጥ ከጭቁን ወታደሮች ጋር የተፋፋመ የሽምቅ ዊጊያ ተዋግቷል ፡፡ ኩባ አራተኛ አገሩ ናት ፡፡ በመጨረሻም ኢምፔሪያሊዝምን እየተዋጋ በጀግንነት የወደቀው በአምስተኛ አገሩ በቦሊቪያ ነው ፡፡

ቼ ጉዌቬራ የአብዮታውያን አብዮተዊ ነው ልንል እንችላለን ፡፡አባዛኞቹ አብዮታውያን በትውልድ አገራቸው ውስጥ የገዛ ህዝባቸውን ከጭቆና ነፃ ለማውጣት ነው ሚዋጉት ፡፡ ቼ ግን ሌላ ነው ፡፡የሰውን ልጆች ከጭቆና ለማላቀቅ ነው፡፡ የትም ይሁን የትም ጭቆናን እንዋጋለን! ማንም ይሁን ማንም ጨቋኝን እናወድማለን! ማንም ይሁን ማንም ለጭቁን እንሞታለን!

ቼ ጉዌቬራ አስም ወይም አስማ የሚባለው ትንፋሽን እፍን እፍን የሚያደርገው ፣በሽተኛውን አስጨናቂና የሚያይ የሚሰማውን  ሰው የሚያሳቅቅ በሽታ ፣ ገና በልጅነቱ ተቆራኘው ፡፡በሽታው ከማየሉ የተነሳ ቼ ትምህርት ቤት መግባት አልቻለም ፡፡አስተማሪ ቤቱ እየመጣ ያስተምረው ነበር ፡፡ እንግዲህ ቼ ጉዌቬራ ግማሽ የአልጋ ቁራኛ ፣ግመሽ የቤት እስረኛ ሆኖ ነበር መኖር ያለበት እንጅ ፣ጦር ሜዳ ይሄዳል ብሎ ማን ያስብ ነበር ?

እንግዲያው ምን ለውጥ መጣ? በሽታው ተሻለውን? በጭራሽ ቼ ከበሽታው ጋር እልክ ተያያዘ፡፡ያመኛል እሰቃያለሁ እንጅ በሽተኛ አይደለሁም ፡፡እምቢ በቃ ! በመንፈስ ጥንካሬ ብዛት ነው ቼ ህክምናም የተማረው ፣ጭቆና ላይም የዘመተው ፡፡ አስቸገረ ቼ ጉዌቬራ ላቲን አሜሪካን አመሳት ፡፡ የጭቆናና የብዝበዛ አማልእክትን እንቅልፍ ነሳቸው፡፡ 

ሲ አይ ኤ ተላከ፡፡ቼን በቦሊቪያ ጫካ ከበቡት ፣ገደሉት መልእክታቸው ተሳካ ግን-ቼ ጉዌቬራን ገደልነው ብለው ቢያወሩ ፣ ማንም አያምናቸውም ፡፡ማንም፡፡ ስለዚህ የሬሳውን ፎቶግራፍ አሰራጩ፡፡‹‹ቼ ጉዌቬራ ቅዱስ ነው ››የሚሉ አሉ ባለጥይቱ ቅዱስ ፡፡ እንግዲህ የቼ ጉዌቬራ አምላክ የነፃነት አምላክ አብሮን ይሁን ፡፡ አሜን ፡፡

እኔና ዝናዬ ጨክነናል

ወርኃ ጥቅምት 2017 ዓ.ም መንግሥት አድርጌዋለሁ ያለው 300% የደሞዝ ማሻሻያ ተግባራዊ ሊደረግ ነው የሚል ዜና በሰማንበት ማግስት ደጉ አከራያችን ሆስፒታል አድሬ ስመለስ ጠብቀው ያዙኝና " ቁርስ በልተህ ቡና ጠጥተህ ተመልስና የማናግርህ ነገር አለኝ " አሉኝ።  የታዘዝኩትን ፈፅሜ ተመለስኩና ለምን እንደፈለጉኝ ስጠይቃቸው ወቅቱን ያማከልና ከጥቅምት 30/2017 ዓ.ም ጀምሮ ተግባራዊ የሚሆን የቤት ኪራይ ማሻሻያ ለማድረግ መወሰናቸውንና ልጅ አሳዳጊ መሆናቸውን፣ የኑሮ ውድነቱም እየናረ መሆኑን ታሳቢ በማድረግ በወር 700 ብር ብቻ እንደጨመሩብኝ አረዱኝ።

በተመሳሳይ ቀን እኔና ዝናዬ በጠረጴዛ ዙሪያ ቁጭ ብለን ከተወያዬን በኋላ ቁርጥ ያለ ውሳኔ ላይ ደረስን። አንበላም አንጠጣም ብለን የገዛናትን  ቤት አዘገጃጅተን ለመግባትና ዶሮ እርባታ ለመጀመር ተስማማን። ውሳኔው ቀላል የሚባል አልነበረም ፤ ጭካኔ ይፈልጋልና ጨክነናል። ሁለት ወር ባልሞላ ጊዜ ውስጥ በሯን አስገጥመን፣ ውስጧን አስለስነን፣አጥሯንም በቆርቆሮ አሳጥረን በእለተ ሐሙስ ህዳር 12/2017 ዓ.ም (የህዳር ሚካኤል እለት )እቃችን ጠቅለለን ወደ ቤታችን ገባን። የቤት መግዣውን ሳይጨምር ውስጧን ለማስለሰን 16000 ብር፣በርና መስኮት በላሜራ ለማሰራት 17000 ብር፣ አጥሯን በቆርቆሮ ለማሳጠር 24000 ብር በድምሩ 57000 ብር ጨርሶብናል።

ይህን ለማድረግ ደግሞ ወደፊት የግል ክሊኒክ ለመክፈት የገዛሁትን centrifuge(15000 ብር ), autoclave(15000 ብር ), examination bed(6500 ብር),  ፍሪጅ(25000 ብር ተገዝቶ 18000 ብር የተሸጠ)፣ እንዲሁም ለማንበቢያ የገዛኋትና እንደ ዓይኔ ብሌን የምወዳትን Tablet(9000 ብር) መሸጥ ነበረብኝና ሽጥኩ። መጨከን ነበረብኛ!
ዶሮ እርባታውን ለመጀመር ግን ጨክኖ መነሻ በጀቱን የሚሸፍንልን sponsor እንፈልጋለን።
አስቻይ ሁኔታዎች
1ኛ የተመቻቸና በቂ ቦታ ያለን መሆኑ
2ኛ. ቀዳማዊት እመቤቷ ( ወ/ሮ ዝናሽ መኬ ) የተመሰከረላቸው የዶሮ እርባታ expert መሆናቸው
3ኛ. የጠቅላዩ ዶሮ እርባታን የሚያበረታታ አቋም

በጀት
የቄብ ዶሮ መግዣ: 100*300=30,000
የዶሮ ቤት መስሪያ: 10,000-15,000
የቄብ መኖ 5 ኩንታል*5000ብር =25000
መመገቢያ 4*300= 1200
መጠጫ :2700
የእንቁላል መጣያ ሳጥን: 1500
የእንቁቃል መሰብሰቢያ: 270
አካፋና መዶሻ :2*500=1000
ሳፋ :2*400=800
ፕላስቲክ ባሊ:2*200=400
ለውኃ ማስገቢያ :10,000-15,000
ሮቶ :2000
ለክትባትና መድኃኒቶች(H2O2ና ሳሙናን ጨምሮ) :5000-7000
ሌሎች ወጪዎች 15000-20000

ጠቅላላ ድምር 80000-120000

እኔና ዝናዬ ጨክነናል!
ዝናሽ የዶሮ እርባታ  ማእከል እውን ይሆናል።

19 ዓመት ተምሮ ለምድር ለሰማይ የሚከብድ ማእረግ እንደተጫነበት አንድ ኢትዮጵያዊ ሀኪም ይህን ጦማር ይዞ  ማህበራዊ ሚዲያ ላይ መውጣት በራሱ ሌላ ከፍ ያለ ጭካኔ ይጠይቃል።
ገረማችሁ አይደል። አትገረሙ ደግሞም አትሰስቱ ። ይልቁንም የአቅማችሁን ጠጠር ወርውሩ  ፤ repost በማድረግም ለሚመለከታቸው አጋር አካላት አድረሱልን።
ስልክ:+251918666678/+251962443989
BOA Acct: 212465933
                      ZINAYE MEKIE YITAYH
CBE Acct: 1000316337949
                     Getaneh Kassie Gashu

https://lnkd.in/gjmvvQ4h

በልብስ ወበሢሳይ ኢታርእዪኒ ንዴተ

 በልብስ ወበሢሳይ ኢታርእዪኒ ንዴተ

እስመ ቁር ወረኃብ ያረስእ ጥበባተ

በአፄ ምኒልክ ዘመን አለቃ ተክሌ የሚባል የንጉሥ ተክለኃይማኖት አሽከር በአፈ ንጉሥ ይግዛው ስም የተንኮል ማህተም ቀርጠኻል በሚል ተወንጅሎ እስር ይፈረድበታል። ወህኒ ቤት በገባ ጊዜም "ስለ እግዚአብሔር ብለው አይርሱኝ፤ ለጃንሆይ ያስተዛዝኑልኝ፤ ዘመድ የለኝም"ብሎ አሳላፊ ውቤን ወደ እጨጌ ወልጊዮርጊስ ላከ። አለቃ ተክሌ ወህኒ ቤት ሳለ መልክአ ኤዶም ይደግም ነበረ። ያን ጊዜም ከበጅሮንድ ገድሌ ቤት ታሥሮ የተቀመጠው አለቃ ተገኝ "ወረድኦ ለነዳይ በተጽናሰ (ችግረኛውን በችግሩ ጊዜ ረዳው)" የሚል ሕልም ስለ አለቃ ተክሌ አየ።

አለቃ ተክሌ መልክአ ኤዶም እየደገመ ባዘነበት የሰኔ ማርያም እለት እጨጌ ወልደ ጊዮርጊስ ለእቴጌ ጣይቱ ነገረለት። እቴጌ ጣይቱም "ለጃንሆይ ነግሬ አስፈታዋለሁ፤ ጉራምባ ማርያምን ይሥልልኛል" አለች። ከዚያም " አለቃ ተክሌን ፈተው ለእኔ ይስጡኝ፤ ጉራምባን ይሣልልኝ፤ በሎልነቱ ታዝዞ ማኅተም ቢሰራ በርሱ ምን ኃጢአት አለበት ?" አለችና ለጃንሆይ ተናገረች። እጨጌ ወልደጊዮርጊስም አከታትሎ አስተዛዘነለት ።አፄ ምኒልክም "እሽ ይፈታ" አለ።

ለአማኑኤል ተስሎ ቀሚሱን በሰጠበት ሰኔ ፳፰ ቀን የአማኑኤል ዕለት ከወህኒ ቤት ወጣ። ከተፈታ በኋላ ለእቴጌ ሹም ለአዛዥ

ዘአማኑኤል ተላለፈ። አዛዥ ዘአማኑኤልም ራት ምሣውን፣ ምንጣፍ ሥፍራውን አዘዘለትና በማዕረግ ተቀመጠ። ነሐሴ ፪ ቀን እቴጌ ጣይቱ ሙያውን ልትሰልል "ሥዕለ ማርያም በወረቀት ሥለህ ስደድልኝ" ብላ ላከችበት። እርሱም ፩ ሉክ ወረቀት ተቀብሎ ጥሩ ሥዕል ሥሎ ከሥዕሉ ግርጌ

ኢትኀድግኒ ዓቂበ

በልብስ ወበሢሳይ ኢታርእዪኒ ንዴተ

እስመ ቁር ወረኃብ ያረስእ ጥበባተ

[መጠበቅን አትተይኝ

በልብስና በምግብ ችግር አታሳይኝ። ብርድና ረሃብ ጥበብን ያስረሳልና።] የሚል ጽሑፍ ጽፎ ሰደደላት።

እቴጌ ጣይቱም ሥዕሉን አይታ አደነቀች ፤ለጃንሆይም አሳየች ። ከሥዕሉ ግርጌ ያለውን ጽሑፍ ባየች ጊዜ አዛዥ ዘአማኑኤልን ተቆጣች። "ካላስራብኸው እንዲህ ብሎ አይልክም" አለች። አዛዥ ዘአማኑኤልም ከመጣ እስከ ዛሬ ድርጎው አልገደለበትም። "እንዲያው ጎጃሞች ልፍ(ማሳጣት፣ክስ) ይወዳሉ "አለና አለቃ ተክሌን ተጣላው። እቴጌ ጣይቱ ግን የሰርክ ልብስ፣የሌሊት ቡልኮ፣ ለቀን ጥበብ ኩታ፣ እጀ ጠባብና ሱሪ በርኖስ ዳረገችው። ነሐሴ ሲያልቅ ጳጉሜ ፫ ቀን ጉራምባን ይሣል ብላ ፫ ዳውላ እህል ቀለብ፣ ፪ ጉንዶ ማር፣ ለወር ፩ ሙክት፣ ለ ፲ ቀን ፭ ኩባያ አሻቦ፣ ፩ እቃ ቅቤ፣ ጾም ቢሆን ቅባኑግ ለወር ዳረገችው። የቀለም መበጥበጫ ፲፪ ፍንጃል አዘዘች።

ኢትኀድጉኒ ዓቂበ

በልብስ ወበሢሳይ ኢታርእዩኒ ንዴተ

እስመ ቁር ወረኃብ ያረስእ ጥበባተ

[መጠበቅን አትተውኝ

በልብስና በምግብ ችግር አታሳዩኝ። ብርድና ረሃብ ጥበብን ያስረሳልና።]

ፍኖተሰላም ሆስፒታልን ከልጅነቴ ጀምሮ አውቀዋለሁ።

ፍኖተሰላም ሆስፒታልን ከልጅነቴ ጀምሮ አውቀዋለሁ።

የታመመ ሰው ህክምና ለማግኘት ጥዋት 11 ሰዓት ላይ ከሆስፒታሉ ግቢ ውጭ ነበር ወረፋ የሚይዘው (ይሰለፋል)። ወይም ወረፋ ከሚይዙ ወጣቶች መግዛት ይጠበቅበታል (ከተሜ ከሆንህ ነው)።

እድለኛ ከሆነና ከውራጌወች ካመለጠ ፣ ከብዙ ስቃይ በኋላ ወደ ሆስፒታሉ ቅጥር ግቢ ውስጥ እንዲገባ ይፈቀድለታል። እድለቢስ ከሆነ ደግሞ በተረገሙ ውራጌወች ተደብድቦ ገንዘቡንና ስንቁን ይቀማል (ህክምና ሲመጣ ስንቅ ተይዞ ነበር የሚመጣው ቢያንስ ለሳምንት የሚሆን፣ ክብ ዳቦ፣ ዳቦ ቆሎ፣ በሶ)። አልያም ለቀጣይ ቀን ይቀጠራል።

ከሆስፒታሉ አጥር ውስጥ ሳይገባም ህይወቱ የሚያልፍ ብዙ ታካሚ ነበረ። ሀኪም አግኝቶ ታክሞ ከተሻለው ፣ ተንበርክኮ መሬት ስሞ ፣ አገር ይባረክ ፣ ወንዝ ይባረክ፣ አገራችን ኢትዮጽያን ይጠብቅልን፣ ገበያውን ጥጋብ ያርገው፣ በእውቀት ላይ እውቀት ደርቦ ይስጥህ ብሎ ከልቡ መርቆ ይሄዳል።

ካልተሳካ ደግሞ ወደ ባህርዳር ወይም ደብረማርቆስ ሪፈር የሚባለው ታካሚ በጣም ብዙ ነበር (ወደ ከፍተኛ ተብሏል ፣ ግልኮስ ተደርጎበታል፣ ህመሙ ሳይጠናበት አልቀረም፣ ኧረ እኔስ ፈርቻለሁ አይመለስም ፣ይባል ነበር) ።

ያን ሁሉ መከራ ግን ዛሬም አልቀረም ፣ ብዙ ነገሮች በተሻሻሉበት ዘመን ፣ ወንበር ላይ ተቀምጦ ኦክስጅን ይወስዳል፣ ፈጥኖ የመጣና እድለኛ ከሆነ ደግሞ የጎኑ ማሳረፊያ ደረቅ ወንበር ያገኛል፣ አልያም ፍሳሽ የሚወርድበት ክፍል ውስጥ የዛገ አልጋ ላይ ጣል የተደረገች ብል የበላት ፍራሽ ትሰጠዋለች።

አካባቢው የተማሩ ልጆች እያሉት፣ እያመረተና እየገበረ ምን ስላደረገ ነው ይህ ማህበረሰብ በዚህ ልክ የሚሰቃየው! ተማርን የምንል ሰዎች፣ ነጋዴዎች እና ባለስልጣናት የማህበረሰቡ ህመም ሊያመን ይገባል።

ለዚሁ ዓላማ ብቻ የተከፈተውን የ telegram group ይቀላቀሉ።

https://t.me/+TIwYt7rpFg5iYjA0

NB: "ውራጌ" ማለት በአካባቢው ዘዬ ሌባ ፣ ነጣቂ ፣ ቀማኛ፣ ዘራፊ ማለት ነው

ዶ/ር የሮም ጌታቸው የፍ/ሰላም ሆስፒታል ሜዲካል ዳይሬክተር

ኑ! ሆስፒታሉን ሆስፒታል እናስመስል

ግርማዊነታቸው ከጣሊያን ጦርነት በኋላ ከስደት ወደ ኢትዮጵያ ሲመለሱ የጎጃም እምብርት ላይ በምትገኝና ወጀት ተብላ በምትጠራ ትንሽዬ ከተማ ላይ ከአጃቢዎቻቸው ጋር እረፍት ያደርጋሉ። እስከዚያን ጊዜ ድረስ ያደረጉት ጉዞ በሰላም የተሞላ ነበርና ከተማዋን ፍኖተ ሰላም ብለው ሰየሟት። የሰላም መንገድ ማለታቸው ነው፡፡ ከከተማዋ ወጣ ብለውም ለማስታወሻ ይሆን ዘንድ አንድ ዋርካ ተከሉ።

ጃንሆይ በቆይታቸው ሰው ሰው አክባሪ፤ወዲህ እንግዳ ተቀባይ፤ አካባቢው ጤፍ፣ በቆሎ፣ ዳጉሳ፣ ኑግ፣ በርበሬ እና ሌሎችንም የእህል አይነቶች የሚያበቅል፤ ሎሚ፣ ብርቱካንና ፓፓዬ እንደልብ የሚግኝበት፤ በተፈጥሮ ለምነትን የታደለ፤ መሆኑን አስተዋሉ። የባከልን ቡና ቀምሰውም በጣዕሙ ተደመሙ። ጃንሆይ ምልከታቸው በዚህ አላበቃም፡፡ የአካባቢው ህዝብ በስጋ ደዌና በቲቪ በሽታ እንደሚሰቃይ አይተው አውጥተውና አውርደው ሆስፒታል አስገነቡለት፡፡

ከ62 ዓመታት በፊት ቲቢና ስጋ ደዌ በሽታን ለማከም ታስቦና አብዛኛው ወጪው በህዝቡ ተሸፍኖ የተገነባው ፍ/ሠላም ሆስፒታል በ1976 ዓ.ም በከፍተኛ የአካባቢዉ ማህበረሰብ ተሳትፎ ማስፋፊያ ተደርጎለት በገጠር ሆስፒታል ደረጃ ለማደግ የቻለ ሲሆን፤ ከ2012 ዓ.ም ጀምሮ ወደ ጠቅላላ ሆስፒታልነት በክልሉ ጤና ጥበቃ ቢሮ ለማደግ ችሏል፡፡ ተቋሙ 297 የጤና ባለሟያዎች እና 102 የአስተዳደር ሰራተኞች በድምሩ 399 ቋሚ ተቀጣሪ ሰራተኞችን ይዞ ለአካባቢው ማህብረሰብ አገልግሎት በመስጠት ላይ ይግኛል፡፡

በ2016 ዓ.ም 88,230 የተመላላሽ ታካሚዎችን ፣5,704 ተኝቶ ታካሚዎችን ፣ 11,462 የድንገተኛ ክፍል ታካሚዎችን፣3,479 የወሊድ አገልግሎት፣1,754 ከፍተኛ ቀዶ ጥገና ስራዎችን እና ሌሎች ዘርፈ ብዙ የሆስፒታል አገልግሎቶችን ሲሰጥ የከረመ ሲሆን በአሁኑ ሰዓት በቀን 400-600 ህሙማንን እያስተናገደ ይገኛል፡፡ ሆስፒታሉ በስሩ አምስት የመጀመሪያ ደረጃ ሆስፒታሎች ማለትም( ፈረስ ቤት የመጀመሪያ ደረጃ ሆስፒታል፣ደምበጫ የመጀመሪያ ደረጃ ሆስፒታል ፣ቡሬ የመጀመሪያ ደረጃ ሆስፒታል ፣ዱርቤቴ የመጀመሪያ ደረጃ ሆስፒታል ፣ሊበን የመጀመሪያ ደረጃ ሆስፒታል) እንዲሁም ሶስት የከተማ ጤና ጣቢያዎችን( ቋሪት ጤና አጠባበቅ ጣቢያ፣ ጅጋ ጤና አጠባበቅ ጣቢያ ፣ፍ/ ሰላም ጤና አጠባበቅ ጣቢያ) በስሩ በክላትተር ትስስር ይዞ በመስራት ላይ ይገኛል፡፡

ይሁን እንጅ ይህ የእድሜ ባለጸጋ ሆስፒታል ከአቻዎቹ ጋር እኩል ማደግና ዘመኑን የዋጀ እንዲሁም ያለውን የታካሚ ፍሰት የሚመጥን አገልግሎት መስጠት ባለመቻሉ በተደጋጋሚ ቅሬታዎች ይነሱበታል። በቅርቡ ባዲስ መልክ የተዋቀረው የሆስፒታሉ ማኔጅመንት ይህንን ችግር ለመፍታት ኮሚቴ አቋቁሞ በመንቀሳቀስ ላይ ይገኛል፡፡ ኮሚቴውም ሆስፒታሉ የሚጠበቅበትን አገልግሎት በአግባቡ እንዳይሰጥ ማነቆ የሆኑበትን ችግሮች በመለዬት እንደ ችግሩ ስፋትና ክፋት በቅደም ተከተል ለመፍታት ደፋ ቀና በማለት ላይ ነው፡፡

ስለሆነም የፍኖተሰላም ከተማና አካባቢው ነዋሪዎች፣ተወልጆች፣ባልሃብቶች፣አዋቂና ታዋቂ ሰዎች፣የሚመለከታችሁ የመንግስት አካላት፣መንግስታዊና መንግስታዊ ያልሆናችሁ ድርጅቶች ሆስፒታሉን ሆስፒታል ለማስምሰል በምናደርገው እንቅስቃሴ ሁሉ ተቋሙን እንደ ራሳችሁ ቤት ቆጥራችሁ ከጎናችን እንድትቆሙ ስንል በአክብሮት እንጠይቃለን፡፡

ለዚሁ ዓላማ ብቻ የተከፈተውን የtelegram group ይቀላቀሉ

https://t.me/+TIwYt7rpFg5iYjA0

"We need our limited health resources for things which are actually killing us"

We are chasing COVID 19 off a cliff.
The majority of our population, who don't already seek modern medical care are now even more afraid to visit hospitals. For this reason work at hospitals has slowed down.

Health education given about COVID 19 doesn't seem balanced based. Based on the world population review, in our country 1984 peoples die every day and a big chunk of that number is by medical reason. Remember why we let RVI +ve mothers to breast feed, inspite of clear CDC recommendation that "the best way to prevent MTCT through breast milk is not to breastfeed" We  rather take the risk with the RVI than the malnutrition. We should apply the same principles in this scenario.

Let me refer the EDHS 2016 and mention the areas which will be affected more by the decreased patient flow. In Ethiopia, 73% births occur at home with a high maternal mortality rate of 412/100,000 live births and  81 % don't recieve any  postnatal care. "According to Health data .org neonatal disorders are the number one causes of death in Ethiopia". Back to EDHS, the basic vaccination coverage for all eight basic vaccines is 40 % .

You know there isn't much recent data about our morbidities but let's take a report by "world life expectancy" to have a general picture. Diarrheal diseases account for 8% of deaths in Ethiopia, 3.81% are due to Tuberculosis, 7.38% are due to Coronary Heart disease, 3.21 l are due to HIV, stroke 6.23% , cirrhosis 2.24% and meningitis 2.8%. If we consider the world population review report of 1984 death per day in Ethiopia. We will have rough estimation of our disease burden.
©Dr.Kirubel Tesfaye

አላቲኖስ

የፊስአልጎስ ሕቡዕ  የመሰብሰቢያ አዳራሽ በዝምታ አርምሞ ተመቷል።ብዙዎች የገመዳ ውሳኔ ያልጠበቁት የማይታመን ሆኖባቸዋል ።ገመዳ ብዙ ሰላማያወራ ብዙም ስለማንነቱ እንዳያውቁ ስላደረጋቸው መደነቅን ፈጥሮባቸዋል ።

የመሰብሰቢያ አዳራሹን ፀጥታ “አይሆንም”የሚለው የታንቱ ንግግር አደፈረሰው ።”…ይህማ አይሆንም ምን ማለት ነው ?ለምንድነው ለልጆችህ ሰቀቀን የምትሆነው ?ስለምንድነው ይህን የሚያክል ሃላፊነት ትተህ ራስህን ለመከራ የምትዳርገው ?ባይሆን እኔ ሕይወትን ያልጀመርኩት ሐላፊነቱን እወስዳለሁ እንጅ እንዴት ነው አንተ የምትማገደው?”አለ ታንቱ እንባ እየተናነቀው ።

ሐዊ ክው ብላ ደንግጣለች ።ስለደነገጠች ነው መሰል ጉንጯ መሰርጎዱን ያቆመ ይመስላል።በታንቱና በገመዳ ፍቅር ፤ከምንም በላይ ለቤተ ክርስቲያን ሕይወታቸውን ለመስጠት ያላቸውን ቁርጠኝነት ስታይ ደነገጠች ።ክርስትና ከዚህም  በላይ ዋጋ እንደሚያስከፍል በታሪክ ከቅዱሳን መጽሐፍት ብታነብም እንዲህ በዓይኗ ግን ‘እኔ ልሰዋ እኔ ልሰዋ ‘ሲባል አላየችም አልሰማችም።

አበጋዝም ይህ ፍቅር አስደግጦታል።ሌሎች የሥራ አስፈጻሚ አባላትም  የሚናገሩትን ቃላት አጡ።አብጋዝ ግን እንደ ምንም ልውጣ አልውጣ የሚለውን እንባውን አምቆ መናገር ጀመረ ።”እናንተ ምን በወጣችሁ ነው ዋጋ የምትከፍሉት ያወራሁት እኔ ፤የሰበክሁት እኔ፤የደሰኮርኩት እኔ፤ እንዴት ተደርጎ ነው እኔ እያለሁ እናንትነ ሃላፊነት የምትወስዱት ?”

“አይሆንም”አለ ታንቱ በድጋሜ።ሁሌም እንደሚያደርገው መሃል አናቱን ቆፈር ቆፈር አደረገና”አይሆንም ምክንያቱም ብዙ ሰዎች አንተን የማህበረ ቅዱሳን አባል ነው የሚያድርጉህ፤ ስለዚህ አንተ እኔ ነኝ ብትል ለማህበሩ ሌላ መከራ ትጠራለህ እንጅ የምታመጣው ለውጥ የለም።ትርጉም የለሽ መስዋዕትነት ደግሞ አንከፍልም ።የምንከፍለው መስዋዕትነት ደግሞ በምድርም በሰማይም በረከት ቢያመጣልን መልካም ነው ።ሲቀጥል ትናንት አውደምህረት ላይ ሰብከህ ዛሬ ገዳይ ብትባል አሁንም ለቤተክርስቲያናችን ውርደት ነው ።እኛ የማንታወቀው ግን ምንም ችግር የለውም ።”የመሰብሰቢያ ክፍሉ ለጥቂት ሰከንድ ፀጥ አለ።

ዝምታውን ለመስበር ያህል ገመዳ ንግግሩን ዳግም ጀመረ ።”ሁላችንም መስዋዕትነት ለመክፈል የሚያስቸኩለን አይመስለኝም።ዘመኑ ዋጋ ይጥይቃል ስለዚህ ብንቀዳደም እንጅ መስዋዕትነቱ እንደሆነ ለእያንዳንዳችሁ አይቀርላችሁም። ስለዚህ እንደፊስአልጎስ ሰብሳቢነትም ቅድሚያ ሐላፊነቱን ልወስድ ግድ ነው ።ከከራድዮን ወፍ የምንማረው ይህንኑ ነው ።በዚያ ላይ ናፍያድን አውቀዋለሁ።ዩኒቨርሲቲ በአንድ ወቅት ተምረናል።አንድ ዶርምም ኖረናል ስለዚህ ምን አገናኝቷቸው ገደለው ለሚለው ጥያቄ መልስ ይሰጣል።ስለዚህ ይህን ጉዳይ በዚህ እንዝጋውና ስለቀጣዩ ነገር እንወያይ።

ይልቁንስ እኔ ዛሬ የጀመርኩትን ሰማዕትነት እናንተም ቀጥሉበት ።ይህን ሰማዕትነት አላቲኖስ ብየዋለሁ።አላቲኖስ ማለት እውነት፣ከማናቸው በላይ ንጹሕ ማለት ነው ።ለቅድስት ቤት ክርስቲያን የምንከፍለው ዋጋ ንጹሕና እውነት ብቻ ይሆናል።ስለዚህ ሰማዕተ አላቲኖስን ጀመርኩት እንጅ የምትጨርሱት እናንተ ናችሁ።”ሁሉም ስለገመዳ ጽናትና ቆራጥነት ተገረሙ።

አበጋዝ  ደግሞ ‘ይህቺ ቤተክርስቲያን ዛሬም ልጅ አላት ፤ ቅዱስ ያሬድን፣ ላሊበላን፣ይምርሃነ ክርስቶስን፣አባ ጊዮርጊስ ዘጋስጫን፣አባ ቀውጦስ፣አባ ፊሊጶስ፣አቡነ ጴጥሮስን ፣አቡነ ቴዎፍሎስን ፣መልአከ ብርሃን አድማሱ ጀንበሬን፣…የሚተካ ልጅ ዛሬም ተወልዷል ።’እያለ ለራሱ ሲደሰኩር ነበር ታንቱ ንግግር የጀመረው ።

በዚህ የወረርሽኝ ሰዓት ሁሉም ሰው በተለይም ‘ክርስቲያን ነኝ’ የሚል ሁሉ ሊያነበው የሚገባ ሌላ ድንቅ መጽሐፍ ።
Stay at home till the pandemic is over
Keep calm read books with red cover
 አላቲኖስ

አርበኝነት

ሳሎን ላይ ነው እንጅ
ቤትን ጥርቅም አ'ርጎ ከርችሞ በመዝጊያ
ምሽግ ውስጥ አይደለም ያንተና እኔ ውጊያ
በማዳን ነው እንጅ በማፅዳት እጃችን
በመግደል አይደለም አርበኝነታችን
.
መልካም የአርበኞች ቀን

ዶ/ር በላቸው ደስታ

(Legendary Ethiopian Pharmacist)

በኢትዮጵያ የዘመናዊ የፋርማሲ አልግሎት ታሪክ ስማቸው ጎልቶ ይነሳል።የተወለዱት ዳንግላ ነው። ከአባታቸው ከአለቃ ደስታ ድንበሩ እና ከእናታቸው ከወ/ወሮ ህልሚቱ ኪዳኑ ነሐሴ 03፣ በ1935 ዓ.ም ተወለዱ። የመጀመሪያ ደረጃ ትምህርታቸውን እዛው ዳንግላና ቻግኒ ተማሩ። የሁለተኛ ደረጃ ትምህርታቸውን ከፍተኛ ውጤት በማምጣት ጄኔራል ዊንጌት ተቀላቀሉ።

በቀዳማዊ ኃ/ስላሴ ዩኒቨርሲቲ ለመጀመሪያ ጊዜ በሀገሪቱ ከተመረቁ ሶስት የፋርማሲ ባለሙያዎች አንዱ ናቸው። የማህበረሰብ ፋርማሲና የኢትዮጵያ መድሃኒት ፋብሪካ ሰርተዋል። ወደ ቫንኮቨር ካናዳ አቅንተው በብሪቲሽ ኮሎምቢያ ዩኒቨርሲቲ የማስተርስና የፒኤችዲ ትምህርታቸውን አጠናቀዋል።

 የአዲስ አበባ ዩኒቨርሲቲ የፋርማሲ ት/ቤት ዲን ሆነው ለ9 ዓመት አካባቢ አገልግለዋል። በተቋሙ በቆዩበት ዘመን ተባባሪ ፕሮፌሰር በመሆን በርካታ ጥናቶችን አበርክተዋል። ለረጅም ዓመታት የዘለቀውን የ5 ዓመት የፋርማሲ ስርዓተ ትምህርት በመቅረፅ፣ ት/ቤቱን በአቅምና በትምህርት መሳሪያ በማደራጀት፣ ከዓለም አቀፍ ተቋማት ፈንድ በማምጣት ትልቅ አስተዋፅኦ አድርገዋል።

 አንጋፋውን የኢትዮጵያ ፋርማሲ ማህበርን ከመሰረቱት ውስጥ አንዱ ናቸው። የማህበሩ የመጀመሪያው ፕሬዘዳንትም ናቸው። በጤና ጥበቃ ሚንስትር የፋርማሲ ዲፓርትመንትን በመመስረት፤ የአሁኑን የኢትዮጵያ የመድኃኒት አቅርቦት ኤጀንሲን (በቀድሞ ስሙ "EPHARMAECOR") በመመስረት ሂደት ውስጥ ትልቅ አስተዋጽኦ ነበራቸው። የሶስት ልጆች አባት የሆኑት ዶ/ር በላቸው ደስታ የጡረታ ዘመናቸውን በባህላዊ ህክምና ላይ ጥናት በማድረግና እራሳቸውን በመደገፍ ነበሩ። በዚህ ዘርፍ እየሰሩት የነበረ ጅምር ስራ እጃቸው ላይ እንደነበር ሰምቻለሁ። ታመው ግሩም ሆስፒታል መግባታቸውን የሰማሁትም ባለፈው ሳምንት ነበር። ህክምና ላይ እያሉ ሚያዚያ 25፣ 2012 ዓ.ም በ77 ዓመታቸው አርፈዋል። ዶ/ር በላቸው ለህዝብና ለሙያው ባደረጉት አስተዋጽኦ ሲታወሱ ይኖራሉ።
ፈጣሪ ነፍስዎን በአፀደ ገነት ያሳርፍ‼️

ዘላለም ጥላሁን አ.ፕ አ.አ ዩኒቨርሲቲ



...ፍረደን...

ስማኝማ አንድዬ
ስድስት ሺህ ጅራፍ ተቆጥሮ የማያልቅ ስፍር የለሽ በደል
ለከፈልክባት ቀን እንኳን አደረሰህ አይባልም አይደል
.
የሰማዕታት ሀገር የፃድቃን ከተማ
ፅርሐዓርያም እንዴት ነው በበዓል ዋዜማ
ከዙፋንህ ግርጌ ቄጤማ ጎዝጉዘው እያሸበሸቡ
ሰውና መላእክት በአንድ ሲሰባሰቡ
ከመላእክት ምግብ ፃድቃን ሲመገቡ
ሰማይ ቤት እንዴት ነው የበዓል ድባቡ
.
ትዝ ይልሀል አይደል ?
አልጋውን አስይዘህ ያ'ዘለልከው ድኩም
አላውቀውም ብሎ የመታህ በኩርኩም
እንዴት ነው መፃጉ ኑሮ እንዴት ይዞታል
ቸርነትህ ደርሶት እርሱም ገነት ገብቷል
ወይስ የሲዖል ፍም እሣት ተስማምቶታል
.
ኑሮ ከተባለ እኛ አለን እንዳለን
አንተን መስለንና ያንተን አስመስለን
እንደ ኮሶ እንደ ሬት ኑሮ እየመረረን
እኔን ምሰሉ ሚል ቃልህን አክብረን
ሰውን ያክል ክቡር ነፍስ ተሸክመን
ፈውስ ያልተገኘለት new virus አክመን
አድናለሁ ስንል እራሳችን ታመን
.
ሰርዷችንን ግጦ የጠገበ ኮርማ ዞሮ እየረገጠን
ወርቅ የሰፈርንለት አመድና ትቢያ አፈር እየሰጠን
ኑሮ ከተባለ እኛ አለን እንዳለን
አንተን መሆን ባንችል ያንተን አስመስለን
.
እናልህ አንድዬ
እንዳይጎርስ ለጉመው እንዳይሄድ ቀይደው
ቤቱ  እንዳይቀመጥ በሥራ ጥመደው
የሚል ህግና ደንብ ከልካይ አዋጅ ወጥቶ
ተመጥምጦ አለቀ ጉልበታችን ሟሙቶ
.
በራሳቸው ችሎት
ራሳቸው ከሳሽ ራሳቸው ዳኛ ሆነው እየቀጡን
ውኃ ጠማን ስንል ሆምጣጤ እያጠጡን
ከኩንታል ሙሉ ማር ሸክማችን ከበደ
ወዳንተ እንዳንመጣ ጉልበታችን ራደ
እንደ ልባሽ ጋቢ ዋጋችን ቀለለ
እባክህ ቶሎ ና ትክሻችን ዛለ
.
ልብሳችንን ነክተው ደማቸው ቀጥ ያለ ከሞት የተረፉ
ሀኪም ድሮ ቀረ እያሉ ለፈፉ
በእኛ መስዋዕትነት ከመቅሰፍት የዳኑ
በፈውሳቸው ማግስት እኛ ላይ ጀገኑ
 .
መንግሥት!?
መንግሥትማ አለ እንጅ ስራውን ይሰራል
ዘላለም የመንገሥ መብቱን ያስከብራል
የተቃዋሚውን ጀርባ አጥንት ይሰብራል
በጠብመንጃው አረር የደቀቁ እግሮችን ሆስፒታል
ይልካል
እንቶኔና እንትና በፈጠሩት ግጭት እያለ ይሰብካል
.
ተሰባሪው ታዲያ ሰባሪውን ፈርቶ አዳኙን ይከ'ሳል
የሀኪሞች ስህተት ውጤት ነው እያል አቧራ ያስነሳል
በርግጥ ሰው ይስታል እውነቱ አይካድም
በማካሮ ሽጉጥ መስበሩ ባይከብድም
ለዜና ካልሆነ
የተሰበረ እግር በጥገናው ማግሥት ቆሞ አይራመድም
.
እናልህ አንድዬ
በዚች የጉድ ሀገር ባልታደለ ዘመን በጉድ ወቅት ተፈጥረን
አንድ ቀን ከግማሽ ያለምንም ዋጋ ዱቲ ተወጥረን
ሥራ አጥ በሚል ማዕረግ ኩንትራት ተቀጥረን
በእለተ ትንሳኤ ላባችን ገብረን በደማችን ሰክረን
ካሣ' ሙሉ ፈጅቶ የመጣ ሰካራም እያደነቆረን
ልዝብ ያልከው ቀንበር ሸክሙ ከበደን
ነፃ አውጭ ላክልን ወይ መጥተህ ፍረደን
.
 (መታሰቢያነቱ፦ የትንሳኤ በዓልን ከቤተሰብ ተለይታችሁ ሆስፒታል ውስጥ ለምታሳልፉ የጤና ባለሙያዎች በተለይ በአውደ ዓመት ምድር ያለምንም ክፍያ ላብና ደማችሁን ለምትገብሩ ኢንተርን ሀኪሞች እንዲሁም ምንም ነገር ባልተሟላበት ሁኔታ ከኮሮና ቫይረስ ጋር ለምትዋጉ የጤና አርበኞች ይሁንልኝ ።)

ፀባይ

“ቢያንስ በፀባይ ማስተናግድ ትችል ነበር” ይለኛል የማንም ወመኔ የቤቱን ጉድ ሁሉ አግተልትሎ እየመጣ
.
ለመሆኑ በአሁኑ ሰዓት ያለን ኢትዮጵያዊ  ሀኪሞች ከሌላው ሰው የተለየ ትዕግስትና ትህትና እንዲኖረን የሚጠበቀው ለምንድን ነው? አስራ ስምንት ዓመት ሙሉ ተምረን ስለምትከፈለን ለቤት ኪራይ የማትበቃ ደመወዝ (6179) ነው ? እንደ ጅብ ሌሊቱን ሙሉ ስንጓዝ አድረን ስለምናገኛት ለዚያውም በስንት ልመና ስለምትመጣው የተረኝነት አበል ነው? የላቦራቶሪ ግባቶችና የህክምና መሳሪያዎች በሌሉበት አስታማሚዎቹ ሲያለቅሱ አብረን ከማልቀስ ውጪ ምንም ማድረግ በማንችልበት ባዶ ህንፃ ውስጥ ተቀምጠን የጤና መድህኑን ብቻ አንጠልጥሎ የመጣን ከሞት አፋፍ ላይ ያለ ታካሚ እያየን  ስንጨነቅ ስለምንውል ነው? ቆይ ምን አድርጉ ትሉናላችሁ ?
.
ሁሉም በየቤቱና በየመሥሪያቤቱ ጉዱን አስቀምጦ “ሆስፒታል” ሲመጣ እራሱ ላይ ፈልጎ ያጣውን ጨዋነት ሀኪሙ ላይ ካላገኘሁ ሞቼ እገኛለሁ ይላል። ስታሳድገኝ ያላስተማርከኝን ጨዋነት ከየት እንዳመጣው ትፈልጋለህ? ያኔ አስፓልት ላይ አንበርክከህ እንደ ሌባ አርባ ጊዜ አስገርፈኸኝ ዛሬ ለምን ፊትህን አጠቆርክብኝ ብለህ ያዙኝ ልቀቁኝ ስትል ትንሽ አይሸምምህም? ሂድና ይችን ምርመራ አስረትህ ና እምቢ ነው! ይችን መድሃኒት ከውጭ ግዛና ውሰድ “ያንተ መነገጃ አድርገኸኝ” ነው! የላቦራቶሪና የህክምና መሳሪያዎች ይሟሉልን ብለን ጥያቄ ስናነሳና ድምፃችንን ስናሰማ ህዝብና መንግሥት እየተቀባበሉ “ሀኪሞች ጠግበው ሥራ አቆሙ” ነው ። “ልትወልድ የመጣች እናት ትተው ሰልፍ ወጡ” ነው። ባልታደለ ዘመን በግም ወቅት ተፈጥረን በሁለት ወጥመድ የተያዘች ቆቅ ሆነን አርፍናትኮ ጎበዝ !!!
.
©ዶ/ር ጌታነህ ካሴ
ፍ/ሠላም ሆስፒታል

ዘመቻ

አንት የኮስትር አሽከር የቴዲ አልጋ ወራሽ ስማኝ ወንድም ጋሸ
በለስላሳ አንደበት በቅቤ አንጓች ምላስ ቀርቦ እያሞካሸ
ሊያጀልህ ቢሞክር የማንም ወስላታ
አቤት ወዴት ብለህ ትጥቅህን አትፍታ
ሚስትህን ከሽፍታ ታግለህ እንድታስጥል
ሽመል ከዘራህን ከክንድህ አትነጥል
እምቢ በል ጀግናዬ ፎክር እንደ አባትህ
በባንዳ ከሃዲው በሰላቶው ሁሉ አይደፈር ቤትህ
አስከትለኝና ዝመት ወደ ጫካው እንሂድ ወደ ጋራው
በክንድህ ብርታት ነው የነፃነት ጮራ ፀሐይህ ሚያበራው
ልጅህን ተዘርፈህ ምንድን ነው ዝምታ
ክንዳለሜ እያለች እህትህ ታግታ
ውርደትን ታቅፎ ምንድን ነው ምኝታ
እስከ መቼ ትዕግስት እስከ መቼ ዛቻ
እስከ መቼ ድረስ የቃላት ጦርነት የስድብ ዘመቻ
እንዲህ የጭንቁ ዕለት
እንዲህ በክፉው ቀን ልብህ ካልጨከነ
ሦስት ዙር ዝናርህ ምኑን ዝናር ሆነ
ምኑን ነፍጠኛ ሆንክ ምኑን ትምክህተኛ
በርህን ሲቆረቆር አጥርህ ሲነቀነቅ ልብህ እየተኛ
.
.
.
ወይ ነዶ

???

ግዳይ አስቀምጦ ለሕይወት መታጨት

ዘር ቀለም ሳይመርጡ ሰው ከእንስሳ መቅጨት

ፀሐይ ቁር ሳይፈሩ ግዑዝ ሆኖ ማርጀት

ጠፋች ሞተች ሲባል

ሰላም ለከ ብሎ ዳግመኛ መደርጀት

አጥፍቶ አለመጥፋት ልምድሽ ሆኖ ኑሮ

ኑሮ ኑሮ ኑሮ

ካንቺም በላይ ጀግና ሲመጣ ሲፕሮ

ቁርባ ቁርቢት ቁርጥሽ ነው ዘንድሮ

ቱ!

ያልታደለች ጉብል እድል የጠመማት
በአመንዝራ ዲያቆን
ተደፈርኩኝ ብላ ነገሩ ሲገርማት
የነፍሷ ጠባቂ ካህኑም ደገማት
በየት በኩል አልፎ ፈጣሪዋስ ይስማት?
ቱ!

ጭንቃጭንቅ ዜና

በማድጋ ዞን ሽንክላ ወረዳ ጭንቁላ ቀበሌ የሽንትቤት ቀን በደማቅ ሁኔታ ተከብሮ ዋለ።

አ.ዲ.መ.መ ዘለፋ 8/900010 ዝንጠላ፡ ዲስኩር። በማድጋ ዞን ሽንክላ ወረዳ ጭንቁላ ቀበሌ የሽንትቤት ቀን በደማቅ ሁኔታ ተከብሮ መዋሉ ተገለጸ። የቀብሌው ሊቀመንበር አቶ እንዳመጣው ደባልቄ በበዓሉ ላይ ተገኝተው ባደረጉት የመክፈቻ ንግግር እንደተናገሩት የዘንድሮውን በዓል ከባለፉት ለየት የሚያደርገው ከምንትስ ሚሊዬን በላይ ሶፍትና ወደ ብጥስጥስ የሚጠጉ የሽንት ቤት ወረቀቶችን ለማከፋፈል የቻልንበት መሆኑ ነው ብለዋል ። በበዓሉ ለረዥም ስዓት ሽንት ቤት ውስጥ በመቀመጥ የተሻለ ልምድ ላካበቱ ሞዴል ሽንታምና ተቅማጣም ወጣቶች የማበረታቻ ሽልማት የተበረከተላቸው ሲሆን ሌሎቻችንም የእነዚህን ግንባር ቀደም ወጣቶች አርዓያ ልንከተል እንደሚገባ ተጠቁሟል። ከተሸላሚ ቤተሰቦች አንዷ የሆኑት ወይዘሮ ትንጓለል አዝብጤ በበዓሉ ላይ በመገኘታቸው የተሰማቸውን ደስታ ገልጸው በቅርቡ የሚከበረውን የወስፋትና ወስፋታሞች ቀን ለማክበር ዝግጅት መጀመራቸውን ተናግረዋል።

ከዜናዎቹ ጋር እሣቱ ለብልቤ ነበርሁ ሰላም

ኑሮ ተወደደች ደስታ ተሰደደች
እኔ እበላው ሳጣ ሚስቴ ልጅ ወለደች
ስኳር ጣሪያ ነካ
ግፊቴም ከፍ አለ ብላችሁ ምትፈሩ
ተካፍሎ ማደር ነው የጤና ምስጢሩ

መልካም ዕለተ ሰንበት

"መልካም ያደረጉልንን ሳናመሰግናቸው ይች ቀን አትለፍ" .

የዝቋላ ወረዳ የመጀመሪያ ደረጃ ሆስፒታል በአ/ብ/ክ/መ ጤና ቢሮ ስር ከሚገኙ ሆስፒታሎች አንዱ ሲሆን ለማህበረሰቡ እየሰጠ ያለውን ሁሉን አቀፍ የጤና አገልግሎት ለማሻሻልና አገልግሎቱ በንባብ የዳበረ ብሎም በምክንያትና በእውቀት የተመሰረተ ይሆን ዘንድ EHSTG Reform በሚሰጠው አቅጣጫ መሰረት በሆስፒታሉ ውስጥ ቤተ-መጽሐፍት እንዲኖረን ለማድረግ ፕሮጀክት ቀርፀን እየሰራን መሆኑ ይታወቃል።

በዚህ በአጭር ጊዜ ውስጥ ሥራውን ለማስጀመር የሚያስችሉ የህትመት ውጤቶችን ለማሰባብሰብ ተችሏል። ስማቸው ከታች ለተዘረዘሩትና ለዚህ ዓላማ መሳካት የበኩላቸውን አስተዋፅዖ ላደረጉ አካላት ልባዊ ምስጋናችንን እያቀረብን አሁንም ቢሆን ሥራው ተጀመረ እንጅ አላለቀምና “እውቀት እንረዳለን” የምትሉ ሁሉ በስልክ ቁጥር +251918666678 ወይም በኢሜይል getanehkassie@gmail.com ልታገኙን እንደምትችሉ ለመግለፅ እንወዳለን።

ምስጋና
1.ለወ/ሪት ሳምራዊት እስጢፋኖስ
2.ለደራሲ ይስማዕከ ወርቁ
3.ለዶ/ር ትዕግስት ስለሺ
4.ለአቶ ዘላለም ጥላሁን
5.ለወ/ሮ ዓለሚቱ ደሴ
6.ለኢ.ፌ.ዴ.ሪ ጤና ሚኒስቴር
7.ለሆስፒታላችን ሰራተኞች በሙሉ
.
ዶ/ር ጌታነህ ካሴ
የፕሮጀክቱ አስተባባሪ

የድጋፍ ጥያቄ

……+++…...¡

ሀገር በእውር ድንብር በጭፍን ሲመራ

መንገዱ እንዲታዬን እስኪ አብሩ ደመራ

ስትይ ሰማንና

ደመራ ብንደምር አጋምና ቀጋ

መነገዱም አልታዬን ሌሊቱም አልነጋ

በ hang over ቀመር በኃራራ ስሌት

በሱሰኛ ወኔ በሰካራም ቅሌት

ካልታረሰ መሬት ካልተማሰ ማሳ

በለቃቀሙት ግርድ ጎኗ ላይነሳ

ስንዴውን ከእንክርዳድ እያሰባጠሩ

ሀገሬን አመሷት እነ ስም አይጠሩ

ተዘርቶ መሰብሰብ መልካም ቢሆን ቅሉ

ገብስና በቆሎ ስንዴና ባቄላ በአንድ ሲቀቀሉ

ንፍሯቸው አያምርም አውቃለሁ አንፍሬ

አተር በስሎ ሲልም ገብስ ይሆናል ጥሬ

ባቄላ+ጤፍ+እንክርዳድ+ግብጦ=……….?