Wednesday, July 19, 2017

ውቧ ጽጌረዳ

በድል ያሳለፍሽኝ የሞትን አደጋ፣
እንዳይ የረዳሽኝ የህይወትን ዋጋ፣
የልፋት ደሞዜን የተጋድሎን ፀጋ፤
በውለታሽ ብዛት ያረግሽኝ ባለዳ፣
የመስከረም አደይ ውቧ ጽጌረዳ ፣
ልቤን ያሸፈትሽው ገና በማለዳ፤
ፍቅርን የሰጠሽኝ ጠቅልለሽ በሸማ፣
ስምሽ በአንደበቴ ከፍ የሚል ከማማ፤
ከእንቅልፍ የሚያነቃኝ የጉርሻሽ ትዝታ፣
ድምጽሽ ሚያባንነኝ ሁሌም ጥዋት ማታ፤
ከብርንዶ ይልቅ ሽሮሽ ሚናፍቀኝ፣
አንች በሌለሽበት ወለላ የሚያንቀኝ፤
ተዳፍነሽ የቀረረሽ የልቤን ውስጥ እሳት ፣
እንዴት ይቻለኛል እኔ አንቺን ለመርሳት?
አበባ ጥርሶችሽ ከኔ ይሰንብቱ፣
ሳቅና ጨዋታ ዝና የሚያውቁቱ፤
ብዬ ያዜምሁልሽ የሀሴት ዝማሬ፣
በናፍቆትሽ ስሞት አብሬሽ አድሬ፤
አምባገነን ሥልጣን ከላይ የተቸረው ፣
መተተኛ ዲያቆን አንደበቴን  ቢያስረው፤
ማሰንበት ቢቻለው ጭድን ከእሳት ጋራ፣
ማስታረቅ ቢያውቅበት ሸማን ከገሞራ፣
በአንቺ እና እኔ መሀል ቢያፈልስ ተራራ፣
መውደዴን ባልነግርሽ ቢያዝ አንደበቴ፣
እርሳኝ አትበይኝ አይችልም አንጀቴ።
ፍቅሬን ባልገልጽልሽ ቢዘጋ ልሳኔ፣
እርሳኝ አትበይኝ ችሎ አይችልም ጎኔ።

©ጌች ቀጭኑ ለY.F 
ሐምሌ 12/2009 .

Thursday, July 13, 2017

ማን ዘርቶ ማን ያጭዳል?

አንድ አርሶ አደር  ያልዘራውን ስንዴ ወይም አርሞ ኮትኩቶ ያላሳደገውን አዝመራ መከር ሲደርስ እሰበስባለሁ ብሎ ሊከራከር እንደማይችል ማንም ሰው የሚያውቀው ጉዳይ ይመስለኛል። ታዲያ  በዩኒቨርሲቲ ቆይታው ተቸጋግሮ  ሲማር፣ እንደ አጋጣሚ በንባብ ተጠምዶ ሳያስበው የካፌ ሰዓት በማለፉ ጾሙን ድፍት ብሎ ሲያድር፣ እንደ ሌሎች ሻይ ቡና ብሎ ወደ ንባብ የሚመለስበትን ቀን ሲናፍቅ፣ ይቺ የሻይ ቡና ይቺ ደግሞ የሳሙና  ትሁንህ ያላሉትን ተማሪ ዛሬ ላይ ዳቦ ጋግሬ፣ ጠላ ጠምቄ፣ ሙክት አርጄ፣ ፍሪዳ ጥዬ አስመርቅሀለሁ ማለት የሞላኝ የደላኝ ሀብታም ነኝ ብሎ ለመመፃደቅ ካልሆነ በቀር ሌላ  ምን ትርጉም ይኖረዋል? ተቀያሪ በሌላቸው ልብሶቹ የጓደኞቹ መሳለቂያ  እስከሚሆን ሲቸገር  ለደብተር እና ለእስክርቢቶ እጁን ያልዘረጋ ዘመድ የምረቃ ዕለት እንደ ድንገት የ90 ብር አበባ እና የ5ሺህ ብር ስማርትፎን ይዞ ማዘጥዘጡስ ምን ሊበጅ? ማን የዘራውን፣ ማን አርሞና ኮትኩቶ  ያሳደገውን፣ ማን ያጭዳልያልዘሩትን አጫጅ ከመሆን ይሰውረንማ አቮ !!! ለማንኛውም ተመራቂዎች እንኳን ደስ ያላችሁ ብያለሁ።
 ሰኔ 1/2009 .ም :ሲስኮ

Wednesday, July 12, 2017

ምጥን

እስካሁን ከማውቃቸው ደጋግ  ሴቶች አንዷ ነች።የይርጋለም ተወላጇ እና 2ኛ ዓመት የኮምፒዩተር ሳይንስ ተማሪዋ ምጥን ሃይረዲን ። ዛሬ ሚያዚያ 14 ቀን 2009 ዓ.ም ከምሽቱ 11:40 ላይ የአባላት ጉዳይ ስብሰባ ለመሳተፍ ወደታች ቤት ስሄድ እሷም እዬሄደች ኑሮ የግቢው መውጫ በር ላይ ተገናኘን።ሰላምታ ተለዋውጠን ትንሽ አብረን እንደተጓዝን የምታደርሰው እቃ እንዳላት ነግራኝ የሆነ ሱቅ ደርሳ ተመለሰች።

ስትመለስ እንደ አካሄዷ ብቻዋን አልነበረችም አንዲት በግምት 8 ወይም 9 ዓመት የሚሆናት ህጻን አስከትላ ነው የመጣችው።ህፃኗ በስስት ዓይን ሽቅብ ሽቅብ እያየች ትከተላታለች። በደብተሯ ጀርባ ላይ አድርጋ በነጭ ፔስታል የተቋጠረ የገብስ ቆሎ ይዛለች። ለመስጠት አልመች ስላላት መሰለኝ ያዝልኝማ አለችና ደብተሯን እና ቆሎ የተቋጠረበትን ፔስታል አስታቀፈችኝ ። ስይዝላት ቋጠሮውን ፈትታ በአንድ እጇ እያፈሰች አብራት ለመጣችው ልጅ ሁለት ጊዜ ሰጠቻት። ልጅቱ ሁለት እጆቿ ቆሎውን መያዝ አቅቷቸው እየተቸገረች ካጠገባችን እንደቆመች ሁለት ሶስት ጊዜ ቃም ቃም አደረገችና በሀሴት ተሞልታ እየሳቀች ከፊታችን ተሰወረች።

Tuesday, July 11, 2017

አታሳደኝ በለኝ


ወደህና ፈቅደህ የፈጠርኸኝ ጌታ፣

ምስጋና ይብዛልህ ይድረስህ ሰላምታ።

በመላእክት ሀገር በጻድቃን ከተማ፣

ክብርህ የገነነ በኤረር በራማ፣

ጸሎቴን ተቀበል ልመናዬን ስማ።

ማሳደጃ ጦማር የሹመት ደብዳቤ፣

የሀጢአት ፍላጻን በወገቤ አንግቤ፣

በዝሙት በሐሜት በክፋት ታጅቤ፣

ወንጌል ዲቃላ ስል ጥበብን ተርቤ፤

የመወጊያውን ብረት ስቃወም በፀና፣

“አታሳደኝ” በለኝ ድምጽን አሰማና።

በምድረ ደማስቆ የወረደው መብረቅ፣

የልቤን ደጅ ይምታ አለቱም ይሰንጠቅ፤

ሳታቆስል ማርከኝ አድርገኝ ምርጥ እቃ፣

ስምህ በአንደበቴ የሞተ ሰው ያንቃ።

የእስር ቤቱ መዝጊያ መሀሉ ይፈለጥ፣

ክብርና ሞገስህን በባሪያህ ላይ ግለጥ።

በደስታ ልዘምር ምድር ትደባለቅ፣

ጠላቴን ይጭነቀው አካላቱ ይለቅ።

ጸናጽሌን ልያዝ ከበሮዬን  ልምታ፣

ዓለም ግሩም ትበል ታምርህን አይታ።

((©ጌች ቀጭኑ)):ገዳም ሰፈር
ሐምሌ 4/2009 ዓ.

Wednesday, July 05, 2017

🎓አውቆ የደደበ🎓

ለሰው ግድ የሌለው አምላኩን ማይፈራ፣
እንኳን ለወድንሙ ለእናቱ ማይራራ፣
ግን ደግሞ
“የተማረ” ተብሎ በማዕረግ ሚጠራ፤
ጭንቅላቱ ከስቶ ምላሱ ያበጠ፣
በሰይፍ አንደበቱ እልፍ የቆረጠ፣
አብዶ ያልወጣለት ምራቁን ያልዋጠ፣
የትህትናን ደጅ እግሩ ያልረገጠ፤
ከፍቅር ገበታ  እጁ ያልዘገነ፣
የተስፋው ጭላንጭል ከፀጉር የቀጠነ፤
በምስኪኖቹ ላብ ከርሱን የሚሞላ፣
ሰቆቃ እና ስቃይ የሚመስለው ተድላ፤
በወይን ጠጅ ያይደል በግፍ የሰከረ፣
በክፋት ተሞልቶ ጢምብራው የዞረ፣
አውቆ የደደበ  ስንት ማይም አለ!
((©ጌች ቀጭኑ)): ሰኔ 27/2009 ዓ.